اخر الاخبارمجتمعنا

أحمد عمر…هل انا شكلى قبيح؟

لا_للتنمر

كتبت : سمر الجنزوري 

 

نشر شاب مصرى إسمه أحمد عمر من أبناء كفر الشيخ اليوم عبر حسابه الشخصى فيس بوك وحكى أنه تعرض لموقف أثناء تقديمه لكليه التربية الرياضية وهو كالاتى …

 

(“هل انا شكلي قبيح!!؟) 

موقف حصلي إنهارده وأنا بقدم كلية تربية رياضية..

رحت الساعه ٩ الكلية عشان أقدم الورق وأدخل الاختبارات وقعدت انزل واطلع من الساعه ٩ للساعة ١ وبعد كدا قعدت ساعه على ما دخلوني ودفعت ٤٥٠ جنية الأول غير الورق اللي صورته وبعد كدا دخلت وقلعت بلبوص لامؤخذه ماعدا البوكسر وبعد كدا قست الطول والوزن وطلع مناسب جدا .

 

بعد كدا رحت للدكتور التاني عشان الاختبار.. أنزل عشره ضغط.. أقف على مشط رجلك ونط.. أقعد واقف وإنت مربع من غير ما تسند وبعد كدا قالولنا ننزل الكمامه وبعدها لقيت نظراته ليا اتغيرت وقعد مركز معايا شويه ومركز ف شفتي أوي…

بعدها ندهلي قالي إسمك اي قولتله كذا كذا يادكتور قالي اي اللي ف شفتك دا.. قولتله عمليه حضرتك وبعد خمس شهور بالكتير هعمل عمليه تانيه وشفتي هترجع طبيعيه وهشيل التقويم وهبقا زي الفل.

 

 قالي طب ارجع تاني وقفت مع زمايلي فلقيته قالهم روحوا انتو للخطوات اللي بعد كدا وقالي أقف انت عاوزك..

طبعا انا استغربت.. اللي هو في أي وبعدين اي البصات اللي بيبصهالي دي ف بعد ما ذنبني شويه قالي تعالى..

فروحت قالي روح البس هدومك وروح.. قولتله ليه يا دكتور دا انا حتى لسه ما دخلتش اختبار الجري ولا حتى الخطوات اللي بعد كدا..

قالي انت شكلك مينفعش.. قالي عشان مصلحتك بس قولتله الكليه كلها حركه وجرى وسباحه ولو في بوكس وملاكمة ف انا بقول لحضرتك انا بعد خمس شهور كل دا هيبقا زي الفل.

 

 قالي انت كشكل اصلا مينفعش يبني وبعد كدا قالي يلا اتفضل روح البس وروح… طب اقسم بالله ان كان معايا واحد ميقلش عن ١٢٠ كيلو واتقبل عادي…

نزلت سألتهم وقولتلهم عاوز ال٤٥٠ بتوعي عشان امشي لاني لسه حتى مدخلتش الاختبارات

ولا عملت اي حاجه يعني دفعتهم عالفاضي الاقي الأمن يقولي بح ياباشا كان فيه وخلص مينفعش تاخدهم تاني.

 

 ‏طلعت لحد مهم فوق ف مكتبه قالي طالما كتبت اسمك عالظرف يبقى متعرفش تاخدهم.. قولتله تمام بس انا اصلا مدخلتش الاختبارات يعني لو دخلت اوك إنما أنا مدخلتش..

ان جيت للحق معاملته كانت في منتهى الاحترام بس على كلامه انه ميقدرش يعمل شئ نزلت وانا مش مسامح ف الفلوس طبعا..

اللي موتني أن انا ليه متقبلتش.. علشان شكلي مش لايق عالكليه على كلام اللي كان فوق في الكشف الطبي.. 

والله مش انا اللي خلقتني عشان اكون وحش فنظركم “).

 

تصدرت كلمات أحمد عمر كا تريند فى مواقع التواصل الإجتماعى فيس بوك وتويتر تعاطف الكثير معه

مؤكدين أنه يجب القضاء على ظاهرة التنمر وما ينتج عنها من أذى نفسى يؤدى فى بعض الحالات إلى إنتحار صاحبه لشعوره أنه منبوذ وغير مرغوب بيه فى المجتمع .

الوسوم

شروق الشافعي

طالبة في الفرقة الرابعة- كلية اداب قسم اعلام شعبة صحافة (جامعة المنوفية)

مقالات ذات صلة

اترك تعليقاً

زر الذهاب إلى الأعلى
إغلاق